ბათუმში ფრანგული განათლებისა და კულტურის კერის დაარსებას საფუძველი ჩაეყარა 2001 წელს. ეს იყო უმნიშვნელოვანესი ნაბიჯი რეგიონში ევროპული სტანდარტების განათლების დასანერგად და ქართულ-ფრანგული კულტურული ურთიერთობების გასაღრმავებლად.
სკოლის გახსნას დიდი საზოგადოებრივი რეზონანსი მოჰყვა. პროექტის განხორციელებაში უდიდესი წვლილი მიუძღვით ფრანგულ მხარეს, საქართველოში საფრანგეთის საელჩოსა და ადგილობრივ ინიციატორებს. გახსნის საზეიმო ცერემონიას ესწრებოდნენ როგორც ადგილობრივი ხელისუფლებისა და განათლების სფეროს წარმომადგენლები, ისე საპატიო სტუმრები საფრანგეთიდან.
სკოლის განვითარებასა და წარმატებაში ფასდაუდებელი წვლილი მიუძღვის მის დამფუძნებელსა და პირველ დირექტორს ლუიზა თუთარაშვილს. მისი დაუღალავი შრომა და ფრანგული კულტურისადმი ერთგულება საერთაშორისო დონეზე იქნა დაფასებული.
2013 წელს, საფრანგეთის მთავრობის სახელით, საქართველოში საფრანგეთის საგანგებო და სრულუფლებიანმა ელჩმა, რენო სალენსიმ, ლუიზა თუთარაშვილს საზეიმოდ გადასცა აკადემიური პალმის ორდენი (Ordre des Palmes académiques).
აკადემიური პალმის ორდენი საფრანგეთის ერთ-ერთი უძველესი და უპირველესი სამოქალაქო ჯილდოა, რომელიც ჯერ კიდევ 1808 წელს ნაპოლეონ ბონაპარტემ დააწესა. 1955 წელს ორდენის სტატუსი განახლდა და მას მას შემდეგ გადასცემენ როგორც ფრანგ, ისე უცხოელ მოქალაქეებს, რომელთაც განსაკუთრებული წვლილი შეაქვთ მსოფლიოში ფრანგული კულტურის პოპულარიზაციასა და განათლების განვითარებაში.
სკოლის ცხოვრება მხოლოდ აკადემიური წარმატებებით არ შემოიფარგლება. ჩვენი მოსწავლეები აქტიურად მონაწილეობენ სახელოვნებო პროექტებში და განსაკუთრებით ამაყობენ თეატრალური წარმატებებით - სკოლამ არაერთხელ გაიმარჯვა ფრანგულენოვანი სკოლების თეატრალურ ფესტივალში. ეს გამარჯვებები კიდევ ერთხელ ადასტურებს, რომ ჩვენთან ფრანგული ენის შესწავლა ცოცხალი, შემოქმედებითი პროცესია.
წლების განმავლობაში სკოლამ უამრავი თაობა აღზარდა. დღეს ეს ისტორიული ფურცელი ჩვენი საამაყო საწყისია, რომელზეც დგას ჩვენი თანამედროვეობა და მომავალი. ჩვენ ვაგრძელებთ ტრადიციას, რომელიც მოსწავლეებს გზას უხსნის ევროპული განათლებისკენ და ამკვიდრებს მაღალ სტანდარტს, რომელიც დაარსების დღიდან ჩვენი სკოლის სავიზიტო ბარათია.